恩群福音堂 · AI ESSENTIALS · 第二課
一張手機相，變一套專業形象
唔使去影樓、唔使識修圖。上載你自己一張相，即場出返擺得上履歷、名片嘅專業頭像。零基礎，不分年紀。
📅 10 月 25 日（日）🕒 下午 3:00 – 5:00📍 恩群福音堂 · 創匯國際中心 7 樓 D 室
之後仲有：第三課 11/22 · 第四課 12/13（全部主日）
10 月 25 日（日）
第二課：一張手機相，變一套專業形象
去影樓影一輯相要幾百蚊、等成個星期。呢一堂你用返自己部手機影嗰張相，即場出返一張擺得上履歷、名片、LinkedIn 嘅專業頭像。
堂上有個專為呢課整嘅 App：上載你張相，十二款風格揀一款即出，由專業頭像、懷舊菲林，到坐喺奶茶杯邊嘅迷你版你。但重點唔係撳個掣就靚。上半堂你會先自己打字叫 AI 畫，下半堂再睇專業嘅指令點樣寫，兩者一比，你就知差喺邊。
仲會教你揀 AI 模型：有啲保樣最好，有啲平一半，有啲出字最準。同埋一個好多人踩過嘅陷阱：AI 畫中文字經常出簡體或者錯字，點樣避，堂上示範。
下面啲相，全部係由講員一張手機自拍出嚟嘅，冇去過影樓、冇用過修圖軟件。你嗰張相，一樣做到。
每堂尾段：AI 搵食站
用當堂學嘅嘢，做一件同你份工、你盤生意、你嘅事奉直接有關嘅嘢。 同一個動作，四種用途——待業當求職、打工仔當個人品牌、做生意當客戶開發、教牧當事工推廣。
邊個啱嚟
- 返緊工，想少做幾個鐘嘅
- 搵緊工，想份履歷同人唔同嘅
- 做緊生意，冇人手做設計做宣傳嘅
- 教牧同工，想有多啲時間做人嘅工夫嘅
- 就嚟退休，想睇下自己半世嘅本事可以點轉型嘅
唔使識電腦。識用 WhatsApp、識開 email，就跟得上。
兩句話想講清楚
一，呢個係恩群主辦嘅活動。我哋唔會喺堂上傳教，每一堂都係實實在在教嘢。但最後一堂尾段， 我會傾一個我自己好著緊嘅話題：AI 咁勁，咁人嘅價值究竟喺邊？ 你聽完覺得唔啱聽，照走冇問題。
二，唔係要你信咗先學到嘢。你唔信基督教、你係第一次踏入教會、你純粹想學 AI——全部歡迎。真係。